ახალი ამბებიპოლიტიკა

სერგი კაპანაძე – რაც ლიეჟში მოხდა, „ქართული ოცნების“ მხრიდან ბუზისგან სპილოს შექმნის მცდელობა იყო – გაუგონარია, ასეთი აგონია

ის, რაც გუშინ ლიეჟში ხდებოდა, იყო „ქართული ოცნების“ მხრიდან ბუზისგან სპილოს შექმნის მცდელობა, – ამის შესახებ „ევროპული საქართველოს“ ერთ-ერთმა ლიდერმა სერგი კაპანაძემ „ინტერპრესნიუსის“ კითხვის საპასუხოდ განაცხადა.

მისი თქმით, ნორმალური პრაქტიკაა, როდესაც ყოფილი პრეზიდენტი ხვდება თავის მომხრეებს რომელიმე ქვეყანაში, „თუმცა ის, რაც ხდებოდა, იყო სრულიად არანორმალური“.

„არანორმალურია, როდესაც „ქართული ოცნება“ ცდილობს ჩაშალოს ასეთი ტიპის შეხვედრა იქ თავისი მომხრეების გაგზავნით. აშკარა პროვოცირებას ჰქონდა ადგილი. მე მიმაჩნია, რომ ეს ნამდვილად იყო ჩვენი ქვეყნის რეპუტაციისთვის მიყენებული ზიანი. გაუგონარია, ასეთი ტიპის დამოკიდებულება და აგონია „ქართული ოცნების“ მხრიდან“, – განაცხადა სერგი კაპანაძემ.

რაც შეეხება იმ გზავნილებს, რომელიც გუშინდელ ღონისძიებაზე იყო გაჟღერებული, „ევროპული საქართველო“ შეფასებას არ აკეთებს და მოსახლეობას მოუწოდებს, გაიგონ, რომ მთავარი გამოწვევა დღეს არის ბიძინა ივანიშვილი და ის უნდა დამარცხდეს არჩევნების გზით.

„ყველა პოლიტიკური ძალა, რომელიც იქნება ამ მიზნისთვის მობილიზებული, უნდა იყოს მხარდაჭერილი შემდეგი არჩევნებისთვის. „ევროპული საქართველოს“ ამოცანაა, ის ორპოლარულიანი დისკუსია, სააკაშვილი-ივანიშვილი გადავიდეს სხვა სიბრტყეში. ყველანი უნდა გავერთიანდეთ და ყველამ ვიბრძოლოთ, რომ ივანიშვილი აღარ დარჩეს ხელისუფლებაში და აღარ მოახდინოს ხელისუფლების უზურპაცია“, – განაცხადა სერგი კაპანაძემ.

შეგახსენებთ, რომ ბელგიის ქალაქ ლიეჟში, კონგრესის სასახლის ტერიტორიაზე, გუშინ საქართველოს ყოფილი პრეზიდენტი მიხეილ სააკაშვილი ემიგრანტებს შეხვდა. შეხვედრაზე რამდენიმე ინციდენტი მოხდა.

წყარო

მეტის ნახვა

მსგავსი სიახლეები

ასევე იხილეთ

Close